နှင်းကိုမွေးတဲ့ဒီဇင်ဘာ (မွေးနေ့လက်ဆောင်)

ဒီဇင်ဘာဆိုတာ ကျွန်တော့်ဘ၀အတွက် အရေးပါဆုံးလတစ်လပါ... ကျွန်တော့်ကို မွေးဖွားသန့်စင်ခဲ့တဲ့ လတစ်လလည်း ဖြစ်သေးသည်လေ॥ အဲဒီအရေးပါတဲ့လမှာပဲ.... နောက်ထပ် ကျွန်တော်ချစ်ရ၊ခင်ရ၊ လေးစား ရတဲ့ အကိုကြီးတစ်ယောက်ရဲ့ မွေးနေ့လည်း ရှိသေးတယ်လေ... သူကတော့ ဒီဒီးတဲ့... ဘ၀အတွက် ရေခြား မြေခြားမှာ ဆေးပညာသင်ယူနေတဲ့ ကြိုးစားတဲ့ အကိုကြီးတစ်ယောက်ပါ.... သူ့မွေးနေ့က (၂၆।၁၂।၂၀၁၁) မှာ ၂၄နှစ်ပြည့်ပါပြီ... သူ့ရဲ့ မွေးနေ့လေးမှာ ကျွန်တော့်ရဲ့ ချစ်စွာသော ဘလော့ဂါအပေါင်းအသင်း များနဲ့ မွေးနေ့ပွဲလေးတစ်ခု ကျင်းပပေးချင်ပါတယ်... ဒါက ရပ်ဝေးကိုရောက်နေတဲ့ သူ့အတွက် ကျွန်တော် အကောင်းဆုံးလုပ်ပေးနိုင်သော မွေးနေ့ပွဲလေးပါ..... ယနေ့မှစ၍ ကိုဒီးတစ်ယောက် ပျော်ရွှင်ခြင်းအပေါင်း ပိုင်ဆိုင်နိုင်ပါစေခင်ဗျာ.... တစ်ခါတည်းဖိတ်လိုက်ပါတယ်॥ (၃၁।၁၂।၂၀၁၁)မှာလည်း မွေးနေ့တစ်ပွဲရှိပါတယ်॥ လာရောက်အားပေးကြပါဦးနော်...

ဒီဇင်ဘာ
သူမရဲ့ လက်တွေနဲ့
အေးစက်တဲ့ နှင်းမှုန်တွေကို
ကိုင်ဆုပ်လို့ လူသားတစ်ယောက်ကို ဖန်ဆင်း
ငါတို့မြေကို နင်းစေခဲ့တယ်.....

ဒီဇင်ဘာ
ရွက်ကြွေတောထဲမှာ တောင်လေတရှိုက်ကို
မက်မောစွာရှူရှိုက်လို့
လယ်ကန်သင်းရိုးတွေနောက်
တကောက်ကောက် ပြေးလိုက်ခဲ့မိပေါ့
ထင်းရူးနံ့လည်း သင်းပျံ့စွာ.....

ဒီဇင်ဘာ
အေးစက်စက်နှင်းမှုန်တွေအောက်မှာ
လမ်းတစ်ခုကိုဖောက် ဘ၀တစ်ခုကို
မြေတောင်မြှောက်ပေးခဲ့ပေါ့....
ကျေးဇူးပါ ဒီဇင်ဘာ....

ဒီဇင်ဘာ
အေးချမ်းတဲ့ တောင်လမ်းတလျှောက်
မီးခိုးမှိုင်းမှိုင်း အရိုးပြိုင်းပြိုင်းအပင်တွေနဲ့
ဆီးနှင်းတွေ ဖမ်းဆုပ်ရင်း
မရေရာတဲ့ဘ၀အတွက်
အတွေးတွေ နယ်ချဲ့ခဲ့မိတယ်....

ဒီဇင်ဘာ
လွမ်းပေမယ့်မလွမ်းရက်ပါ
ရှည်လျားတဲ့ဆောင်းညတွေမှာ
ငါတစ်ယောက်တည်း အထီးကျန်ဖြတ်သန်းဆဲပါ.....

ဒီဇင်ဘာ
အထီးကျန်ငါ့ဘ၀မှာ လမ်းပြပေးမယ့်
ကြယ်တစ်စင်းလောက်များရှိရင်
အေးစက်စက်ငါ့ရင်ခွင်ကို
ကြယ်ရောင်နဲ့ဖမ်းစားခွင့်ပြုပါ....

ဒီဇင်ဘာ
ငါ့ကိုမွေးတဲ့နင်
ငါ့လက်ကိုဆွဲလို့ အချစ်တစ်ခုကို
ရက်စက်စွာ လက်ဆောင်ပေးနိုင်ပါတယ်.....

ဒီဇင်ဘာ
မွေးမြတဲ့ တောင်ဇလပ်တွေပွင့်ချိန်
နေကြာရိုင်းတို့ အစွမ်းကုန် ကြွားဝံ့ချိန်မှာ
ချယ်ရီတစ်ပွင့်နဲ့အတူ အချစ်ကို မြည်းစမ်းခွင့်ပြုပါ.....

ဒီဇင်ဘာ
ဝိုင်ချိုချိုတွေမလိုအပ်ပါ
နွေးထွေးတဲ့လက်တစ်စုံနဲ့ အေးစက်စက်မြူနှင်းတွေကို
ငါ့ရင်ခွင်ထဲ အပြည့်သွတ်သွင်းပေးပါ
စောင့်စားလျက်ပါ ဒီဇင်ဘာ......

ဒီဇင်ဘာ
ငါ့ရဲ့အောင်လံ ငါ့အတွက်မဟုတ်
မင်းရဲ့ မြူနှင်းတွေလည်း မင်းအတွက်မဟုတ်
သာယာချိုမြိန်တဲ့ နေ့ရက်တွေမှာ
ချစ်သူရဲ့ လက်တစ်စုံကို ကိုင်စွဲကာ
အချစ်ကိုဂုဏ်ပြုဖို့သာ...

ဒီဇင်ဘာ
ကြမ်းရှတဲ့ငါ့ရဲ့ဘ၀ထဲမှာ
ထိရှလွယ်တဲ့ နှလုံးသားတစ်စုံကို
လက်ဆောင်ပေးခဲ့တာမင်းလား
ငါချစ်တဲ့ဆီးနှင်းတွေနဲ့အတူ
ငါ့နှလုံးသားကို နူးညံ့စွာ သိမ်းယူဆန်းသစ်ပါတော့....

ဒီဇင်ဘာ
မင်းရဲ့ ကြည်နူးဖွယ်ကောင်းတဲ့
လက်အစုံကိုဖမ်းဆွဲလို့
အေးချမ်းစွာအိပ်စက်တော့မယ်
ငါ့ဘ၀အတွက် ဘာမှမလိုတော့ပါ
အချစ်တစ်ခုသာ လက်ဆောင်ပေးပါ ဒီဇင်ဘာ...

ခံစားချက်တွေ နင့်သီးစွာခံစားခဲ့ဖူးတဲ့ ကိုဒီး.... ရိုးသားစွာ ရင်ဖွင့်ပြောပြတတ်တဲ့ ကိုဒီး..... ကိုဒီးရဲ့ မွေးနေ့အတွက် ကျွန်တော့်ရဲ့ မွေးနေ့လက်ဆောင်လေးကို ကျေနပ်လိမ့်မယ်လို့ မျှော်လင့်ပါတယ်ဗျာ॥ ဓာတ်ပုံတွေကတော့ ကိုဒီးတင်ပြီးသားပုံတွေ မတင်ချင်တာနဲ့ ကြုံတုန်းရိုက်လိုက်တဲ့ လွတ်လပ်ပေါ့ပါးတဲ့ ပုံနှစ်ပုံ ရယ်... တစ်ခုသောညမှာ ကိုဒီးစိတ်ကူးပေါက် တဲ့ချိန်ရိုက်ထားတဲ့ မိနစ်ဝက်ကြာ တင်လိုက်တဲ့ ပုံလေးကို ကိုဒီးမဖျက်ခင်လေးမှာ အမှီဒေါင်းလုပ်ဆွဲထားတဲ့ အိကျီင်္အနီနဲ့ပုံလေးကိုပါ တွဲတင်ပေးလိုက်ပါတယ်... မွေးနေ့ ကဒ်လေးနဲ့အတူ လာရောက်ကြသော သူငယ်ချင်းများအတွက် မစားရ၀ခမန်း ကိတ်မုန့်ကြီးကိုလည်း တင်ပေး လိုက်ပါတယ်ခင်ဗျာ॥ ကျေနပ်နိုင်ကြပါစေ........

ကျွန်တော့်စိတ်ထဲမှာ ဒီကဗျာကိုရေးရင်း ရင်တွင်းခံစားချက် တစ်ခုကို နက်နဲစွာ ခံစားလာရလို့ မရပ်မနားရေးလိုက်မိတာ တော်တော် ရှည်သွားမယ်ထင်ပါတယ်॥ သို့တစေ ကျွန်တော်လေးစားရသော အကိုကြီးအတွက် ကျွန်တော့်ရင်ထဲက စကားလုံးတစ်ချို့ကို စာဖတ်သူများက စိတ်ကြိုက်တွေ့တဲ့ ကဗျာအဖြစ် တစ်စုံတရာသော နှလုံးသားဖြင့် ခံစားလိုက်နိုင်မယ် ဆိုရင် စာရေးသူ ကျွန်တော့်မှာ အတိုင်းမသိဝမ်းသာ မိမည်အမှန်ပါ.... သူငယ်ချင်း အပေါင်းအသင်း ရှားပါးခဲ့တဲ့ ကျွန်တော့်ဘ၀မှာ တိုင်းတပါး ကနေ ငွေကုန်ကျေးကျခံကာ ဂရုတစိုက် ဖုန်းလှမ်းဆက်ပြီး စကားပြောပေးခဲ့တဲ့ အကိုကြီး ကိုဒီးကို လည်း ကျေးဇူးအထူး တင်ပါတယ်...



စာရေးသူ... ကိုကိုးအိမ်(မန္တလေး)
(၂၅।၁၂।၂၀၁၁) ခရစ်စမတ်နေ့မှာ ရေးလို့ပြီးစီးပါတယ်....

ဒီဇင်ဘာရင်ခုန်သံနဲ့ နှစ်ကူးအိပ်မက် (မနမ်းမ၀တဂ်ပို့စ်)

♥ ခရစ်စမတ် ရောက်ခါနီးရင် စိတ်လှုပ်ရှား ပျော်ရွှင်မိပါသလား။

ပျော်သသော်ကောဗျာ… မပျော်ရှိပါရိုးလား.. ဒီဇင်ဘာမွေး…. ကိုကိုးအိမ်က ဒီဇင်ဘာမှာ ကျင်းပတဲ့ ပွဲတိုင်းကို ချစ်တာပေါ့ဗျာ.. ခရစ်စမတ်ရောက်ခါနီးရင် စိတ်ကူးယဉ်ဆန်ပုံများ ဆိုင်တွေကိုလိုက်ကြည့် ဘယ်ဆိုင်က ဘယ်လိုမျိုး ခရစ်စမတ်ကို ကြိုကြတယ်.. ဘယ်ပုံလေး အလှဆင်ကြတယ်ဆိုတာကို လိုက်ကြည့်ပြီး ရင်ခုန်နေတတ်တာမျိုးလေ…. ဗုဒ္ဓဘာသာဆိုပေ မယ့် ခရစ်ယာန်သူငယ်ချင်းတွေ ဘုရားသီချင်းဆိုရင်လည်း ရောယောင်ပြီး အော်ဟစ်နေတတ်တယ်လေ… အဲလောက်ထိ ဒီဇင်ဘာနဲ့ ခရစ်မတ်ကို ရူးသွပ်ပါတယ်ဗျာ..

♥ ကိုယ့်ရဲ့ အိမ်ကို ခရစ်စမတ် သစ်ပင်၊ decoration ornaments များနဲ့ အလှဆင်လေ့ ရှိပါသလား။


အဲလိုတော့ အလှမဆင်ဖြစ်ဘူးဗျ.. ကျွန်တော်က အိမ်မှာနေတဲ့သူလည်း မဟုတ်တာလည်း ပါတာပေါ့.. ဒါပေမယ့် နေ့စွဲတွေက ဒီဇင်ဘာကို အခြေချလာပြီ ဆိုရင် ကျွန်တော်ဝယ်သမျှ ကီးချိန်းလေးတွေကအစ စန်တာကလော့နဲ့ ခရစ်စမတ်သစ်ပင် လေးတွေ ပါတဲ့ ပစ္စည်းလေးတွေဖြစ်နေတတ်တယ်…

♥ နှင်းတွေ အေးခဲနေတဲ့ နေရာကို သွားရောက်လည်ပတ်ချင်ပါသလား။ တကယ်လို့ နှင်းတွေကြားမှာ လက်ရှိနေထိုင်နေရင် နှင်းမပါတဲ့ ခရစ်စမတ်နဲ့ နှင်းဖြူဖြူတွေ ကျရောက်နေတဲ့ ခရစ်စမတ် ဘယ်အရာကို ပိုနှစ်သက်မိလဲ (ရွေးချယ်ခွင့် ရှိမယ်ဆိုရင်ပေါ့)။

လည်ချင်လိုက်တာမှ မွှတ်မွှတ်ကိုလည်နေတာပဲဗျာ… ဒီလိုရာသီဆိုရင် ကျွန်တော်အနေချင် ဆုံးက နှင်းတွေ ဖွေးဖွေးလှုပ်နေတဲ့ ထင်းရူးနံ့သင်းသင်းလေးနဲ့ လေတဟူးဟူးကြားမှာ မွေးနေ့ ပွဲလေးကျင်းပချင်ခဲ့တာပေါ့…. ရွေးချယ်ခွင့်များ ရှိမယ်ဆိုရင်ဖြင့် နှင်းဖြူဖြူတွေ ကျရောက်နေတဲ့ အလှဆုံးခရစ်စမတ်၊ အပီသဆုံး ခရစ်စမတ်ကို ဖြတ်သန်းချင်ပါတယ်..


♥ ခရစ်စမတ်ပိတ်ရက်ကို ဘယ်လို ဖြတ်သန်းချင်ပါသလဲ။ အဲ့ဒီအချိန်မှာ ခရီးထွက်တတ်ပါသလား။

ခရစ်စမတ်ပိတ်ရက်ကို ရာသီဥတုလှပတဲ့ ကိုယ်မရောက်ဖူးသေးတဲ့ နိုင်ငံတွေနဲ့ နေရာတွေ ကိုလည်ပတ်ရင်း ဖြတ်သန်းချင်ပါတယ်… ခရီးကထွက်ချင်ပေမယ့်.. ဒီအချိန်ဆို လက်ထဲမှာ ခရီးထွက်ရလောက်အောင် ပိုက်ပိုက်က မလုံလောက်တဲ့ အချိန်လည်းဖြစ်.. ပရိုမိုးရှင်းတွေ များလွန်းတဲ့ရာသီမို့ ပရိုမိုးရှင်းစာမိတာလည်း ရှိလေတော့ ခရီးထွက်ချင်သော်လည်း မထွက်ဖြစ်ခဲ့တာများပါတယ်ဗျာ..


♥ ချစ်တဲ့ခင်တဲ့သူတွေကို ဘယ်လို လက်ဆောင်လေးတွေ ပေးဖြစ်လဲ။

ဟီးဒါကတော့ ပြောရမယ်ဆို ရယ်ချင်စရာ မောချင်စရာလေးခင်ဗျ.. အကြောင်းက ကျွန်တော် ခရစ်စမတ်လက်ဆောင်ဆိုရင် ဂျယ်လီတုံးလက်ဆောင်ထုပ် လေးတွေနဲ့ ချိုချဉ်လေးတွေက လွဲရင် ဘာမှ ထူးထူးထွေထွေ မပေးဖူးခဲ့ဘူး…. လက်ဆောင်ထူးထူး ဆန်းဆန်းလေးတော့ ပေးခဲ့ဖူးတယ်.. အဲဒါကိုအောက်ကပ်ရပ်က မေးခွန်းထဲမှာ ဖြေထည့်လိုက်ပါတယ်ဗျာ..


♥ ခရစ်စမတ်မှာ အမှတ်တရလေးတွေ ရှိခဲ့ဖူးရင် ပြောပြပေးပါ။

အမှတ်တရက.. ကျွန်တော် ၂၀၀၉ ခရစ်စမတ်တုန်းက နောက်ဆုံးနှစ်ဥပဒေ ဖြေထားချိန်လည်း ဖြစ်လေတော့ စိတ်က မြူးဖျစွာပဲ အနီရောင် စန်တာကလော့ ၀တ်စုံကြီးဝတ်.. နှုတ်ခမ်းမွှေး ဖြူလျားလျားကြီး တပ်ပြီး.. စင်တာတွေလိုက်ပတ်တာဗျာ.. အိတ်ထဲမှာ ပါတာကတော့ ချိုချဉ်တွေနဲ့ ဂျယ်လီတွေချည်းပါပဲ.. အဲဒီမှာ ကျွန်တော်နဲ့ ရင်းနှီးဖူးတဲ့ သူတွေလာရင်ပေးဖို့ ခရစ်စမတ်ကတ်လှလှ လေးတစ်ခု ထည့်လာခဲ့တယ်ဗျ… ရင်တခုန်ခုန် .. မျှော်တလင့်လင့်ပေါ့.. အဲဒီမှာ ပထမဆုံး စတွေ့တာက ကျွန်တော်နေတဲ့ ရပ်ကွက်ထဲက အ၀တ်လျှော်တဲ့ ဘွားတော်က သူ့သားလေး လက်ဆွဲပြီး စင်တာထဲဝင်လာပါတယ်.. အဲဒီမှာ သူကျွန်တော့်ကို မြင်တော့ ထူးဆန်းပြီး သူ့သားလေးကို ပြနေတာ တွေ့လိုက်ပါတယ်.. သူ့သားလေးက တစ်ခုခုပြောလိုက်တော့ ကျွန်တော့်ဆီခေါ်လာပါတယ်..အဲတော့ ကျွန်တော်လည်း စိတ်ဆုံးဖြတ်ထားတဲ့အတိုင်း ကတ်လေး သူ့ဆီပေးလိုက်ရပါတယ်.. အဲ.. သူလည်း ထွက်သွားပြီး မကြာပါဘူး.. ကျွန်တော့်ရဲ့ သုံးနှစ်တာ အချစ်ဟောင်းလေး ကို လှမ်းတွေ့လိုက် ပါတယ်.. သူ့လည်း တွေ့လိုက်ရော… ကျွန်တော့်မှာ ဘွားတော်ကိုပေးလိုက်သော ကတ်လေးကို သတိရပြီး တစ်ခုသောခရစ်စမတ်မှာ မိန်းမကြီးတစ်ယောက်ကို ကျိန်ဆဲလိုက်မိပါတယ်.. (အမှတ်တရလေးပေါ့.. ဟားဟား)


♥ နှစ်သစ် အကြိုညမှာ ဘယ်သူတွေနဲ့ အတူတူ ရှိနေချင်ပါသလဲ။

အဲဒါကတော့ အတ္တကြီးတယ်ပဲဆိုဆို.. တကိုယ်ကောင်းဆန်တယ်ပဲ ပြောပြော ခံရမှာပါပဲ.. ကျွန်တော်ကတော့ ကျွန်တော့်အသက်နဲ့ထပ်တူချစ်ရမယ့်သူ တစ်ယောက်နဲ့ပဲ အတူရှိချင်ပါတယ်.. အေးစက်တဲ့ ဒီဇင်ဘာညမှာ အသည်းခိုက်အောင်ချမ်းလှတဲ့ နှင်းစက်တွေနဲ့အတူ မီးပုံဘေးမှာ အချစ်ဆုံးသူကို ရင်ခွင်ထဲထားပြီး ဘာဘီကျူးကို နှစ်ယောက်အတူစား ချစ်စကားလေးတွေပြောရရင် သိပ်ကောင်းမှာပဲလို့လည်း နှစ်တိုင်းတွေးမိပါတယ်…. သို့သော် ကျွန်တော့်ရဲ့ ဒီဇင်ဘာခရစ်စမတ်ညတွေဟာ အထီးကျန်စွာပဲ ကုန်လွန်သွားရလေ့ ရှိပါတယ်..


♥ New Year Eve မှာ countdown ပြုလုပ်လေ့ ရှိသလား။ အမှတ်တရများ ရှိခဲ့ရင် ပြောပြပေးပါ။

ကောင့်ဒေါင်းလုပ်မယ်ကြံတိုင်း တစ်ယောက်တည်းဆိုတော့ အူကြောင်ကြောင် နိုင်တာနဲ့ ကောင့်ဒေါင်းကို တစ်ခါမှ မလုပ်ဖြစ်ခဲ့ပါဘူး.. တွေးမိတိုင်း ပြုံးမိတဲ့ အမှတ်တရလေး တစ်ခု ရှိပါတယ်.. ကျွန်တော် ၂၀၁၀ နှစ်ကူးမှာ သူငယ်ချင်းအိမ်သွား အိပ်ဖြစ်ပါတယ်.. ကောင့်ဒေါင်း လည်းမလုပ်နိုင်ဘဲ မွေးနေ့အတွက်ပင်ပန်း ထားတာတွေနဲ့ မနက် ၇နာရီထိုးလောက်မှ နိုးပါတယ်… အဲဒီအချိန်မှာ အိမ်ပြင်ထွက်လိုက် တော့ ၁၀ နှစ်အရွယ်ကလေးတစ်ယောက်က ဟက်ပီးနယူးရီးယားလို့ ထအော်ပါတယ်.. ကျွန်တော့် မျက်လုံးတွေတောင် ကျယ်သွား သလိုပါပဲ.. ဒါနဲ့. ဟဲ့ကလေး ညကမအော်ဘဲ ခုမှ ဘာလို့ အော်ရသတုန်း လို့မေးတော့ သူကညကအော်မလို့.. အိပ်ပျော်သွားတော့ ခုမနက် ၇ နာရီမှ ထအော်ရတာတဲ့ဗျာ…. ကျွန်တော့်မှာ ရယ်မိတာ မျက်ရည်တောင် ထွက်ပါတယ်… အဲဒါကတော့ ကောင့်ဒေါင်း အမှတ်တရပေါ့.. ဟားဟား


♥ နှစ်သစ်ကို ကုန်ဆုံးစေချင်တဲ့ နေရာသီးသန့်မျိုး ရှိပါသလား။ အလည်အပတ် အစီအစဉ် ရှိ၊ မရှိ ဖော်ပြပေးပါ။

ရှိပါတယ်ဗျာ.. ကျွန်တော်ငယ်ငယ်တည်းက အိပ်မက်မက်ထားတာက နှစ်သစ်ကူးချိန် ကျွန်တော့်မွေးနေ့နဲ့လည်း ထပ်တူကျတဲ့ ဒီဇင်ဘာနှစ်ကုန်မျိုးမှာဆိုရင် ရာသီဥတု အကြိုက်ဆုံးနဲ့ အလှဆုံးလို့ ကျွန်တော်ခံယူထားတဲ့ ဆွစ်ဇာလန် နိုင်ငံမှာ သွားနေချင်တာပါ.. ကျွန်တော် အကယ်၍များ နှစ်သစ်ကို သွားလည်ဖို့ တစ်နေရာကို ရွေးပါဆိုရင် သေချာပေါက် ဆွစ်ဇာလန်ကို ရွေးမိမှာပါ.. သူ့ရဲ့ ရာသီဥတုနဲ့ ရေမြေတွေ လှပတာကို အရမ်းချစ်ပါတယ်.. အလည်အပတ်အစီအစဉ်ကတော့ ခုချိန်ထိမရှိသေးပါ… ဒီနှစ် နယူးရီးယားနဲ့ မွေးနေ့ကိုတော့ မန်းတလေးမှာပဲ အားလုံး လုပ်သွားမှာပါ.. လာနိုင်သူများလည်း လာခဲ့ကြပါခင်ဗျာ..


♥ နှစ်သစ်မှာ New Year Resolution အနေနဲ့ ဘာတွေ ဆုံးဖြတ်ချက်ချပြီး အကောင်အထည် ဖော်တတ်ပါသလဲ။

အဲဒီလိုမျိုးတော့ အကောင်အထည်မဖော်တတ်ဘူးခင်ဗျ.. ဘာလို့လည်းဆိုတော့ ကျွန်တော် သတ်မှတ်ထားတာက နှစ်သစ်ကူးသွားတယ်ဆိုပေမယ့် သူလည်း ပြက္ခဒိန်ထဲက ရက်စွဲ တစ်ခုပဲလေ.. အဲတော့ ကျွန်တော်တို့ နေ့စဉ်ကြိုးစားရမယ့်အတိုင်းပဲ ကြိုးစားသွားရုံပါပဲ… ထူးပြီးလည်း လုပ်စရာမလိုသလို ဘာမှမလုပ်ဘဲ ထိုင်နေဖို့လည်း မလိုအပ်ပါဘူး.. အကောင်အထည် ဖော်ချင်သပ ဆိုရင်တော့ အလုပ်သစ်စလုပ်မယ်ဆိုရင် ၁ရက်၊၁လ ဆိုတော့ ထိပ်ဆုံးဂဏန်းတွေချည်းပဲဆို လာဘ်ကီးကောင်းတယ်လို့ သတ်မှတ်လို့ရပါတယ်..


♥ နှစ်တစ်နှစ် ကုန်ဆုံးသွားတဲ့ အပေါ် လွမ်းမောတသတာမျိုး၊ အချိန် မကုန်စေချင်တာမျိုး ရှိတတ်ပါသလား။

မလွမ်းမောပါ.. အလွမ်းဟာ ကျွန်တော့်ကို အားယုတ်စေပါတယ်.. နှစ်တစ်နှစ်ကုန်သွားတာ နဲ့အညီ ကျွန်တော့်အသက်ဟာလည်း နှစ်နဲ့ထပ်တူကြီးလာပါတယ်… နှမျောမိတာမျိုး လည်းမရှိသလို တစ်နှစ်ကြီးလာတာနဲ့ ထပ်တူ အသက်နဲ့ လိုက်အောင် ကျွန်တော် ရင့်ကျက် ဖို့ကြိုးစားမိပါတယ်.. အသက်ကြီးလာခြင်းဟာ အိုမင်းခြင်းလို့ မယူဆသလို တစ်နှစ်စာ ပိုပြီး လူရာဝင်လာတယ်လို့ထင်ပါတယ်… မယုံရင် ကလေးတွေကို မေးကြည့်ပါ.. ဟဲဟဲ (သို့သော်. .. ကျွန်တော် အခါများစွာမှာ ကလေးဆန်ဆဲပါ)


♥ နှစ်သစ်ရောက်ရင် ဆွေမျိုး၊ မိတ်ဆွေတွေကို ပို့စ်စကဒ်များ၊ e-card များနှင့် နှုတ်ခွန်းဆက်တာမျိုး ရှိပါသလား။.....................တဲ့

ဟီး.. အဲလိုတော့ ပို့စ်စကဒ်တွေ အီးကတ်တွေ မပေးဖြစ်ဘူးဗျ.. သို့သော် ကျွန်တော်က တော့ နှစ်စဉ် အဲဒါမျိုးတွေကို မြောက်မြားစွာ လက်ခံရတတ်ပါတယ်…. ခင်မင်စွာဖြင့်၊ လေးစားစွာဖြင့်၊ စိတ်ထဲကမပါသော်လည်း လူမှူ့ရေးအရ၊ ချစ်မြတ်နိုးစွာဖြင့် အစရှိသဖြင့် အကြောင်းအရာပေါင်းစုံနဲ့ မွေးနေ့လက်ဆောင်နဲ့နှစ်သစ်လက်ဆောင် တစ်ပေါင်းတည်း ပေးကြသော ကတ်လေးတွေများစွာ ရရှိတတ်ပါတယ်။… သို့အတွက် ပေးပို့ကြသော သူငယ်ချင်းများ၊ မိတ်ဆွေများ၊ အားလုံးကို ကျေးဇူးတင်ပါတယ်.. ကျွန်တော်ကတော့ ချစ်ခင် ရင်းနှီးသော မိတ်ဆွေများကို ဖုန်းဖြင့်ဖြစ်စေ၊ မက်ဆေ့ခ်ျပို့၍ဖြစ်စေ၊ နှုတ်ခွန်းဆက်တတ် ပါတယ်ခင်ဗျာ..
ကဲ.. ဒီလောက်ဆိုရင်ဖြင့် တဂ်မမကြီး မနမ်းမ၀ (အဖြူရောင် နတ်သမီး) တစ်ယောက် ကျေနပ်လောက်မယ်လို့ ထင်ပါတယ်.. ဒီပို့စ်လေးကို တွေ့တော့ အရမ်းရေးချင်စိတ် ပေါ်လာပါတယ်.. ရင်ထဲမှာ ပြောစရာတွေလည်း အများကြီးရှိတာကိုးဗျာ.. နောက်ထပ် မေးခွန်းတွေ ရှိဦးမယ်ဆို လည်း ရင်ထဲက ထွက်လာနေဦးမှာပါပဲ. .. အဲဒီလို ရင်ဖွင့်ခွင့်ရတဲ့ အတွက်လည်း မနမ်းမ၀ (ခ) မကလိုရီ အပျိုကြီးကိုလည်း အရမ်းကျေးဇူးတင်ပါတယ်ခင်ဗျာ.. ဟဲဟဲ..

ဒီဇင်ဘာမွေးတစ်ယောက်အနေနဲ့ ဒီဇင်ဘာကို ချစ်ကြောင်းပြောရမယ်ဆိုလည်း ပြော၍ ကုန်နိုင်ဖွယ်မထင်ပါခင်ဗျာ॥ ပြော၍မကုန် ရေး၍မညောင်းနိုင်အောင်ပဲပေါ့.. ကျွန်တော် ခုတလော တော်တော်ကြီးကိုပျောက်နေ ပါတယ်.. အလုပ်ကြောင့်ပဲ.. ဖေ့စ်ဘုတ်လေး သာဖွင့်နိုင်ပြီး စာလည်းမရေးနိုင်.. ဘလော့လည်း မလည်နိုင်… ကော်နက်ရှင်ကြောင့် ကွန်မန့်တွေလည်း မပေးနိုင်ဖြစ်နေရရှာပါတယ်ဗျာ.. ခုတော့ အိပ်နေတဲ့ သံလိုက် မောင်ကိုကိုးအိမ်တစ်ယောက် မနမ်းမ၀ရဲ့ တဂ်ပို့စ်ပဲစေ့လေးနဲ့ လာနှိုးတော့မှ အိပ်မှုန်စုံမွှား ဖြင့် အတက်စာ စားလိုက်မိသကာလ.. မရေးတာကြာတဲ့ ကိုရွှေလက်က ရပ်၍တောင် မရလေသောကြောင့် သို့ကလောက် စာရှည်သွားရခြင်း ဖြစ်ပေတကား…

ခွင့်လွှတ်ကြပါကုန်အံ့..

စာရေးသူ…। ကိုကိုးအိမ်(မန္တလေး)