သဘာဝမတူတဲ့ တိရစ္ဆာန်တွေ ရင်းရင်းနှီးနှီး နေကြတာကို တွေ့ဖူးမြင်ဖူးကြမှာပါ။ ဒါပေမယ့် ဗြိတိန်နိုင်ငံ၊ ဟမ့်ပ်ရှိုင်းယားမှာရှိတဲ့ မာဝဲလ်တိရစ္ဆာန်ရုံက ကမ္ဘာ့အမြန်ဆုံး သားစားသတ္တ၀ါ ချီတာကျားသစ်လေးကတော့ သူ့ရဲ့အစာနဲ့မှ မိတ်ဆွေဖြစ်နေတာ အံ့ဩစရာပါ ဒါမာမျိုးနွယ် ချေကလေးနဲ့ ချီတာလေးဟာ ခြံစည်းရိုး ခြားထားပေမယ့် ရင်းရင်းနှီးနှီး တွေ့ဆုံခဲ့ကြပါတယ်။ ချေကလေးကလည်း ကျားသစ်ကို ကြောက်စရာလို့ မထင်တာ အံ့ဩစရာပါ။ သူတို့နှစ်ကောင် ခြံစည်းရိုးခြားပေမယ့် တွေ့ဆုံပြီး မြူးထူးနေကြတာဟာ ဒီတိရစ္ဆာန်ရုံရဲ့ ကမ္ဘာလှည့်ခရီးသည်တွေကို ဆွဲဆောင်နိုင်ခဲ့တဲ့ အကောင်းဆုံး မြင်ကွင်းတစ်ခုဆိုလည်း မမှားပါဘူး။
သူတို့နှစ်ကောင် ခြံစည်းရိုးကြားကနေ နှာခေါင်းချင်းပွတ်ပြီး ကျီစယ်နေကြတာကို ဓာတ်ပုံရိုက်နိုင်ခဲ့တဲ့ ITပညာရှင် ပက်ထရက် ကော့စတယ်လိုက “တကယ်ချစ်စရာကောင်းတဲ့ မြင်ကွင်းပါ။ လူတိုင်းလည်း အံ့ဩကြပါတယ်။ ကျွန်တော်တို့တွေဟာ တိရစ္ဆာန်ရုံထဲ နေရာအနှံ့ လျှောက်သွားခဲ့တာပါ။ ဒါပေမယ့် ဒီလိုတွေ့ရတာကတော့ အထူးဆန်းဆုံးပါပဲ”လို့ ပြောပြခဲ့ပါတယ်။ အသက်(၄၅)နှစ် ရှိပြီဖြစ်တဲ့ ပက်ထရစ်ဟာ ခုသီတင်းပါတ် အစောပိုင်းက ပို့စ်မောက်သ်ကနေပြီး ဇနီးနဲ့အတူ ရောက်လာတုန်း ခုမြင်ကွင်းကို ဓာတ်ပုံရိုက်ဖြစ်ခဲ့တာပါ။ ပက်ထရစ်ဟာ ဇနီးနဲ့အတူ တိရစ္ဆာန်ရုံတွေကို မကြာခဏ သွားကြည့်ပြီး အပမ်းဖြေတတ်သူပါ။ “သူတို့နှစ်ကောင် တဖြည်းဖြည်း ကပ်လာတာကို စသတိထားမိတယ်။ နှစ်ကောင်လုံးက မျက်လုံးချင်း မခွာကြဘူးဗျ။ ပြီးတော့ တစ်ကောင်နဲ့တစ်ကောင် စကားပြောသလို အသံပေးနေသေးတယ်။ ပထမတော့ ဒီချေကလေးဟာ တော်တော်အတင့်ရဲတာပဲလို့ ထင်မိသေးတယ်။ ဒါပေမယ့် ကျားသစ်ကလည်း ရန်ပြုချင်ပုံမရဘဲ ခင်ခင်မင်မင် ဖြစ်နေတော့ တော်တော်အံ့ဩရပါတယ်”လို့ ဆိုပါတယ်။ တိရစ္ဆာန်ရုံက သတင်းဖြန့်ချီရေး တာဝန်ခံ ဘီလ်ဟေးကလည်း “ချေတွေဟာ အသည်းငယ်တတ်တဲ့ သတ္တ၀ါတွေပါ။ သူတို့ကို ညစာအနေနဲ့ပဲ စိတ်ဝင်စားတတ်တဲ့ ချီတာတွေကိုမြင်တိုင်း ထွက်ပြေးတတ်ကြပါတယ်။ ခုကိစ္စကတော့ ဘယ်လိုဖြစ်မှန်း မသိဘူး။ ကျားသစ်ကလည်း အစာဝနေပြီး စိတ်ကျေနပ်နေလို့များ ခုလိုမျိုး ခင်ခင်မင်မင် ရှိနေသလား ကျွန်တော်စဉ်းစားကြည့်မိတယ်။ နောက်ပြီးတော့ ချေကလည်း သူ့တစ်သက်မှာ ချီတာကျားသစ် မျက်နှာကို ခုလောက်နီးနီး မမြင်ဖူးလို့ အခွင့်အရေးတုန်း သွားစပ်စုလိုက်တာပဲဖြစ်မယ်။ ဘယ်လိုပဲဖြစ်ဖြစ် အဲဒီနေ့လယ်က နှစ်ကောင်စလုံး ပျော်နေကြတာ အမှန်ပါပဲ”လို့ ပြောသွားခဲ့ပါတယ်။
စာရေးသူ--ကိုကိုးအိမ်(၉.၉.၀၉) ညတစ်နာရီဆယ့်ငါးမိနစ်
0 ယောက်ကစာမူခပေးသွားပါတယ်:
Post a Comment